Авганистанската талибанска влада денеска им нареди на сите странски и домашни невладини организации да престанат да вработуваат жени, што е најновиот рестриктивен потег против правата и слободите на жените.
Наредбата дојде во писмото од министерот за економија Кари Дин Мохамад Ханиф, во кое се наведува дека на секоја невладина организација за која ќе се утврди дека ја прекршува наредбата ќе и’ биде одземена лиценцата за работа во Авганистан.
Министерството соопшти дека добило „сериозни поплаки“ за жените кои работат за невладини организации кои не носат марама или хиџаб. Веднаш не беше јасно дали наредбата се однесуваше на сите жени или само на Авганистанките кои работат во невладини организации.
Талибанските безбедносни сили денеска употребија воден топ за да ги растераат жените во западниот град Херат, кои протестираат против овонеделната забрана за универзитетско образование на жените. Според очевидци, околу дваесетина жени протестирале извикувајќи: „Образованието е наше право!“.
Постои широка меѓународна осуда на забраната за студирање, вклучително и во земјите со мнозинско муслиманско население.
И покрај ветувањето поумерени регулативи, притоа почитувајќи ги правата на жените и малцинствата, талибанците во голема мера го спроведуваат своето строго толкување на исламскиот закон, или шеријатот, откако ја презедоа власта во август 2021 година.
Тие им забранија на девојчињата да посетуваат средно училиште, а сега и универзитети, а на жените им ги забранија повеќето области на работа. На жените им беше наредено да носат облека која ги покрива од глава до пети во јавноста и им беше забрането да влегуваат во паркови и спортски сали.
Авганистанското општество, иако главно традиционално, во последните две децении од владата поддржана од САД, го прифати образованието на девојчињата и жените.
