Австралискиот премиер Ентони Албанес денеска рече дека се надева на пријателски крај на кривичниот прогон на основачот на Викиликс, Џулијан Асанж, откако пратениците го засилија притисокот врз Соединетите Држави и Велика Британија со усвојување на предлог со кој се повикува овој австралиски државјанин да се врати во неговата татковина.
Албанес во парламентот кажа дека деновите пред Високиот суд во Лондон да ја сослуша жалбата на Асанж следната недела за екстрадиција во САД под обвинение за шпионажа се „критични“.
„Се надевам дека ова може да се реши со договор. Не може Австралија да се меша во правните процеси на други земји, но за нас е примерно да го изнесеме својот многу цврст став дека тие земји мора да ја земат предвид потребата сето ова да заврши“, кажа Албанес.
„Без оглед на тоа каде тие луѓе се наоѓаат, оваа работа не може да трае во недоглед“, додаде австралискиот премиер.
Сопругата на Асанж на конференција за новинарите во Лондон кажа дека претстојното сослушување е „прашање на живот и смрт“, бидејќи здравјето на нејзиниот маж во затворот продолжува да се влошува и стравува дека тој ќе умре зад решетките.
„Неговиот живот е во опасност со секој ден колку подолго ќе остане во затвор“, кажа Стела Асанж. „Ако биде екстрадиран, ќе умре“.
Асанж се соочува со дводневно сослушување кое почнува во вторник во Вишиот суд дали треба целосно да ја прифати неговата жалба за екстрадиција. Ако изгуби во таа фаза, ќе ги исцрпи сите правни алатки во Англија, а неговите поддржувачи стравуваат дека би можел брзо да биде испратен во САД пред да може да се жали во Европскиот суд за човекови права.
Албанес е еден од 86 пратеници кои гласаа за предлогот со кој се повикуваат САД и Британија да го „приведат процесот кон крај за господинот Асанж да може да се врати дома кај своето семејство во Австралија“.
Асанж се наоѓа во лондонскиот затвор Белмарш со висок степен на безбедност откако беше уапсен во 2019 година поради кршење на правилата на кауција во сосема друг правен процес.
Пред тоа мина седум години во амбасадата на Еквадор во Лондон за да избегне екстрадиција во Шведска поради обвинувања за силување и сексуален напад, а Шведска во 2019 се откажа од истрагата бидејќи поминало многу време.
