Ученици од Основното општинско училиште „Васил Главинов“ од Велес и членови на драмското студио „Словото“ постигнаа голем успех на Четвртиот меѓународен фестивал на поетски театар, кој се одржа од 16 до 18 мај во Русе, Бугарија.
На фестивалот учествуваа театарски групи од седум земји: Северна Македонија, Австрија, Романија, Кипар, САД, Франција и домаќинот Бугарија.
Велешките ученици Теодора Циунова, Софија Алексовска, Матеј Стојанов, Илија Најдов и Ања Богоевска го изведоа поетскиот перформанс со наслов „Поетско ехо“, креиран според стихови од познатите македонски поети Раде Сиљан и Зоран Пејковски. Претставата беше режирана од актерката Весна Димитрова Бобевски – основач и ментор на драмското студио „Словото“.
Нивната исклучително емоционална и лирична изведба беше наградена со трета награда, што претставува големо признание за трудот, креативноста и уметничката зрелост на младите актери. Стручната комисија го пофали перформансот за неговата длабочина, сценска композиција и јазична изразност.
Овој успех уште еднаш ја потврдува важноста на драмската едукација и улогата на училишните и локалните културни иницијативи во развојот на младите таленти.