Властите во Сардинија нудат финансиска поддршка на луѓето преку специјални програми за преселба во потивки села на островот со цел да ги оживеат руралните области кои со години се соочуваат со намалување на населението.
Преселбата во Сардинија им се претставува на многумина како можност за живеење во попријатна средина, покрај море и блага клима, а на социјалните мрежи оваа можност се опишува како многу примамлива, пишува Mirror.
Програмата е наменета за секој што е подготвен да го регистрира своето живеалиште во град во Сардинија кој има помалку од 3.000 жители. Локалните власти нудат неповратен грант до 15.000 евра по домаќинство за купување или реновирање на имот. Сепак, износот на поддршката не може да надмине 50 проценти од вкупната вредност на инвестицијата.
Кандидатите мора да се обврзат да се преселат во рок од 18 месеци од купувањето на имотот или завршувањето на реновирањето, што има за цел да обезбеди трајно населување, а не само привремен престој.
Покрај почетната поддршка за преселба, има и дополнителни стимулации за оние кои планираат да живеат на островот долгорочно и да основаат семејство. Двојките може да добиваат околу 600 евра месечно за првото дете и 400 евра за второто дете, додека децата не наполнат пет години.
Регионалните власти велат дека ова е дел од поширока стратегија насочена кон обнова на заедниците погодени од емиграцијата и зајакнување на локалната економија. Целта е да се охрабрат луѓето да останат или да се преселат во помали заедници, така што овие области повторно ќе станат привлечни за живеење и одгледување семејства.
За спроведување на програмата е издвоен буџет од 45 милиони евра, што покажува дека властите ја гледаат оваа мерка како долгорочен обид за борба против емиграцијата од руралните средини.
Сепак, поддршката се однесува само на имоти во мали општини, а оние кои веќе живеат на слични места во Сардинија немаат право да аплицираат.
И покрај ова, финансиската помош, побавниот начин на живот и пријатната клима ја направија оваа програма многу привлечна за многу луѓе и генерираше голем интерес на интернет.