Кои се зависни територии во светот?

На територијата на Европа се наоѓаат 44 држави и девет зависни територии, а тоа се: Азорските острови (и припаѓаат на Португалија), Гернзи (под Велика Британија/ВБ), Фарски острови (на Данска), Гибралтар (Велика Британија), Островот Ман (ВБ), Оландски острови (Финска), Свалбад (Норвешка), Света Гора (Грција), Џерзи (ВБ).

Азија е најголемиот континент (30 отсто од копното на планетава), а на неа се наоѓаат 47 држави и три зависни територии – Макао (под Кина), Хонг Конг (Кина) и Акротири и Декелија (Велика Британија).

Африка има 54 држави и девет зависни територии. Зависни се: Канарските острови (од Шпанија), Мадеира (од Португалија), Мајот (Франција), Мелилја (Шпанија), Реинион (Франција), Родригез (Маурициус), Сеута (Шпанија), Сокотра (Јемен), Света Елена (Велика Британија).

**Северна и Средна Америка** имаат 23 држави и 19 зависни територии. Зависните се: Американските девствени острови (под САД), Ангвила (Велика Британија), **Аруба** (Холандија), Бермуда (ВБ), Британските девствени острови (ВБ), Гваделуп (Франција), Гренланд (Данска), Кајмански острови (ВБ), Карипска Холандија (Холандија), Курасао (Холандија), Мартиник (Франција), Монсерат (ВБ), Порторико (САД), Сан Андрес и Провиденсија (Колумбија), Свети Бартоломеј (Франција), Свети Мартин (со главен град Филипсбург зависи од Холандија, а Свети Мартин со главен град Свети Мартин е на Франција), Свети Пјер и Микелон (Франција), Туркс и Кајкос (ВБ).

Во Јужна Америка се наоѓаат 12 држави и зависните територии Фолкландски острови (ВБ), Француска Гвајана (Франција) и Галапагос (Еквадор).

Австралија и Океанија се состојат од 14 држави и 16 зависни територии, како и од бројни ненаселени острови и атоли. Зависните се: Американска Самоа (САД), Божикниот остров (Австралија), Бугенвил (Папуа Нова Гвинеја), Валис и Футуна (Франција), Гвам (САД), Кокосови острови (Австралија), Островите на Кук (Нов Зеланд), Нијуе (Нов Зеланд), Нова Каледонија (Франција), Островот Норфок (Австралија), Островите Питкерн (ВБ), Ротума (Фиџи); Северни Маријански острови (САД), Токелау (Нов Зеланд), Великденскиот остров (Чиле), Француска Полинезија (Франција).

Северен Антарктик опфаќа седум зависни територии: Буве (Норвешка), Јужна Џорџија и Јужни Сендвички острови (ВБ), Островот Петра (Норвешка), Островот на принц Едвард (Јужноафриканска Република), Субантарктички острови (Нов Зеланд), Француски јужни и антарктички земји (Франјција), Херд и Макдоналд (Австралија).