Грок, четбот за вештачка интелигенција дизајниран и развиен од xАИ предводен од Илон Маск, го привлече вниманието на јавноста откако го цитираше самиот Маск кога беше прашан за најголемиот распространувач на дезинформации на платформата Икс (порано позната како Твитер).
Освен Маск, неговата вештачка интелигенција ги именува американскиот претседател Доналд Трамп и Алекс Џонс, американски теоретичар на заговори и водител, како распространувачи на дезинформации.
Овој одговор поттикна дискусии за објективноста и непристрасноста на системите за вештачка интелигенција, особено кога станува збор за чувствителни теми кои ги вклучуваат самите креатори на технологијата.
Грок работи со анализа на големи количини на податоци од интернет, вклучително и содржина од социјалните мрежи, за да генерира одговори врз основа на моделот на пронајдените информации.
Откако корисниците забележаа дека Грок ги наведува Маск и Трамп како ширење на дезинформации, главниот инженер на xАИ, Игор Бабушкин, реагираше и изјави дека се направени неовластени промени во системските поставки на четботот, што резултираше со сомнителни одговори. Тој посочи дека овие промени не ги одразуваат вредностите на компанијата и дека се преземени мерки за да се спречат да се даваат екстремни изјави.
Но, она што е интересно е што ГРОК продолжува да ги дава истите одговори, иако денеска беа објавени информации дека ваквите резултати биле блокирани од компанијата xАИ.
Илон Маск претходно беше обвинет за ширење дезинформации преку платформата Икс, особено во контекст на теми како што се криптовалути, политички прашања и Ковид-19. Иако често беше критикуван за влијанието на неговите објави врз јавното мислење, Маск продолжи да ја користи платформата за да ги изрази своите ставови.