Другарка ми од пред некој месец како да го изгуби здравиот разум. Само се влече по кафичи, по бутици со скапа гардероба, ништо не ја разбирам што зборува. Се однесува вообразено, се облекува без врска, јаде без врска. Целата е за никаде.
А до вчера беше сосема поинаква, а и другарки сме цел живот. Сега е иста како оние водителкине на телевизија. Многу ја сакам и не знам што да правам со нејзе?
Верка
Верка дарлинг, вашата другарка е заразена од моментно најмасовната болест – снобизам, а заболената личност има само еден симптом: да ги импресионира сите оние што се под нејзиното ниво.
Вие би требало да бидете внимателни бидејќи снобовите по правило, се востоличуваат секогаш на сметка на некој друг. Две (не)оправдани причини има за ваков вид на однесување: брзо стекнато богатство или физичка атрактивност, а ни една ни другата не се со голем труд заслужени, нели!?
Најважно, лек нема, а епидемијата зема се поголем замав и последиците секој ден стануваат се пострашни. (Дури и првооделенци го исмеваат соученикот, ако носи ужинка во обична ќеса.) Па така, материјализмот стана позитивна особина, се форсира органска храна, ефтиното по дефиниција веќе не е квалитетно, дури се измислија и снобовски работни места.
Госпојци со стегачи за коса наместо здолништа, водат пладневни емисии на тв, нашминкани како анимир дами и зборуваат што е ин, а што аут, луѓе на наместо да работат нешто, облечени и намирисани како за на свадба, пијат минерална вода по системот капка по капка со часови по кафулињата на таа, едната главна улица и мафтаат со фрази што ништо не значат, лудаци со бесни коли можат да те прегазат на паркинг, старци шетаат кучиња, а внуците ги занимаваат фитнес тренери.
Како до вчера пиевме само боза и се бањавме само за на лекар, а сега сме саде со Chanel 5* на вратот!? Од калдрмата уште ни се смешкаат магариња, од ушите ни излегуваат тулумби и кадаиф, а ние нешто спикаме!?
Не знам, драга моја. Ќе морате некако да се вклопите или ви отиде другарството.
Најбрз начин за трансформација е да забодете очила за сонце на темето со бел оквир од што подречлива марка, стиснете под мишка што поџуџеста џукела и секако, го збогатите речникот со термини како full*, top*, red carpet*, event*, pr*, opinion maker*, briefing*, coffe break*, after work party*, wellness*…
Не дека сум против тоа да станеме свет. Напротив. Конечно и треба да станеме свет. Нормален.
Иако изгледите за тоа се безнадежни, јас сметам дека отпор мора да се дава. Ако за ништо друго, за да се зачува прометејскиот дух…
(Упатствата во оваа рубрика се само субјективно гледање на меѓучовечките релации. Никако не треба да се сфатат како достојна замена за стручно мислење.)