Тргнете го зелениот чај на страна – постојат уште многу други пијалаци богати со антиоксиданси кои вреди да ги пробате
Иако зелениот чај е надалеку познат по високата содржина на антиоксиданси, и други пијалаци се богати со овие соединенија, пренесува „EatingWell“.
Кафето, чајот од хибискус и сокот од калинка исто така се пијалаци богати со антиоксиданси. Покрај нив, експертите препорачуваат и разновидна исхрана богата со антиоксиданси за дополнително зголемување на нивниот вкупен внес.
Зелениот чај е познат по содржината на антиоксиданси, меѓу кои и епигалокатехин галатот, вид катехин кој е предмет на истражувања поради неговото потенцијално противвоспалително и други позитивни дејства врз здравјето.
Сепак, тој е далеку од единствениот пијалак богат со антиоксиданси. Експертите издвојуваат уште пет пијалаци кои можат да содржат повеќе антиоксиданси од зелениот чај, како и намирници кои можат да помогнат дополнително да се зголеми вкупниот внес на антиоксиданси.
1. Кафе
„Кафето е многу потценет извор на антиоксиданси, првенствено во форма на хлорогенски киселини (CGA) и други полифеноли“, вели регистрираната диететичарка Карен Е. Тод.
„Бидејќи кафето е пијалак кој често се консумира и е редовен дел од исхраната на многу луѓе, всушност може да биде значаен извор на антиоксиданси во секојдневната исхрана на просечниот човек.“
Хлорогенските киселини се вид полифеноли со антиоксидативни својства. Истражувањата укажуваат дека овие соединенија можат да помогнат во намалувањето на оксидативниот стрес, кој се јавува кога постои нерамнотежа меѓу слободните радикали и способноста на организмот да ги неутрализира.
2. Сок од бобинки
Бобинките содржат големи количества антоцијани, антиоксидативни соединенија одговорни за нивната темноцрвена, виолетова и сина боја. Овие соединенија се истражуваат поради нивната потенцијална улога во поддршката на здравјето на срцето и крвните садови, како и на метаболизмот.
Тод наведува дека минимално преработените сокови од бобинки со малку или без додаден шеќер, како што се соковите од акаи-бобинки, маки-бобинки и диви боровинки, можат да бидат одличен начин да се искористат нивните антиоксидативни придобивки.
3. Чај од хибискус
Ако сè уште не сте пробале чај од хибискус, можеби е вистинското време за тоа – овој пијалак содржи голем број антиоксидативни соединенија. Обично се подготвува со потопување на исушените надворешни делови од цветот на тропско растение, при што чајот добива темноцрвена боја.
Истражувањата укажуваат дека хибискусот е богат со полифеноли и други антиоксидативни соединенија. Некои студии ги истражувале и неговите потенцијални ефекти врз здравјето на срцето и крвните садови, вклучително и крвниот притисок и оксидацијата на LDL („лошиот“) холестерол.
4. Сок од калинка
Флашираниот сок од калинка станува сè попопуларен, а истражувањата укажуваат дека и тој е богат со антиоксидативни соединенија.
Овие соединенија делуваат како своевидни заштитници во организмот. Тие помагаат во неутрализирањето на слободните радикали кои инаку би можеле да предизвикаат оксидативен стрес, да ги оштетат клетките и да придонесат за развој на хронични заболувања и метаболички нарушувања.
5. Топло какао
„Какаото содржи голема количина флаваноли. Затоа црното чоколадо може да биде дел од исхрана богата со антиоксиданси“, вели Тод.
Флаванолите од какаото се вид растителни соединенија кои се истражуваат поради нивните потенцијални придобивки за здравјето на срцето и крвните садови.
За да добиете повеќе од овие соединенија од топлото какао, избирајте незасладено какао во прав или производ со повисок процент на какао и приспособете ја количината на додаден шеќер според вашите желби.