Новите технологии, според неговите зборови, се закануваат да го избришат човекот од процесот на создавање
Ник Кејв го изнесе своето мислење за актуелната состојба на уметноста во ерата на вештачката интелигенција, истакнувајќи дека не е сигурен дали оваа технологија ќе го „спаси светот“ или ќе го „уништи“.
Музичарот и претходно зборуваше за својата недоверба кон овој софтвер, особено кога станува збор за музиката, но за оваа тема подетално пишуваше во најновото издание на својот билтен „The Red Hand Files“.
Одговарајќи на прашање од обожавател од Бристол, кој го прашал дали во односот кон вештачката интелигенција е „песимист или оптимист“, Кејв покажа колку е скептичен во однос на нејзините можности, пренесува Vijesti.me.
„Вештачката интелигенција можеби ќе го спаси светот, ќе го уништи или ќе направи нешто помеѓу тие две крајности. Не знам“, напиша тој.
Иако не зазеде цврст став во врска со иднината на оваа технологија воопшто, пејачот беше многу поодлучен кога станува збор за сè поголемата улога на вештачката интелигенција во создавањето нова музика.
„Платформите за генерирање песни, според мое мислење, укажуваат на демонскиот потенцијал на оваа технологија во развој да го лиши човечкиот труд од смисла и да ја прекине нашата врска со божественото. Тие го исмеваат самиот чин на создавање, правејќи го човештвото непотребно, земајќи ги плодовите на човечкиот труд и сведувајќи ги на обични производи. Тоа е, можеби, последното и најразорно понижување на човечката душа“, објасни тој, јасно ставајќи до знаење дека не е приврзаник на песните создадени со помош на вештачка интелигенција.
Сепак, неговите коментари се надоврзаа на претходна дискусија во истото издание на билтенот, поттикната од прашање на друг обожавател за тоа дали е можно уметноста да се одвои од уметникот.
Кејв призна дека порано верувал оти таквото раздвојување е невозможно, но дека платформите за генерирање песни го навеле да го промени своето мислење.
„Конечно, уметникот може да се одвои од уметноста. И не само тоа, уметникот – тоа несовршено, хаотично, скршено, бедно, радосно суштество полно со проблеми – може целосно да се отстрани од равенката, како нешто сосема непотребно“, напиша тој.
Осврнувајќи се на двете прашања, додаде:
„За оние кои сакаат светот да се ослободи од проблематичните уметници, бидејќи силите на цензурата сè уште се упорни, ова несомнено е причина за славење, бидејќи овие платформи ветуваат дека ќе го ослободат светот од уметникот воопшто“.
Коментарите на Кејв за вештачката интелигенција доаѓаат во време кога неодамна беше откриено дека неговите песни, како и музиката на неговата поранешна соработничка Кајли Миног, биле користени за тренирање модели на вештачка интелигенција без нивна дозвола.