Џиновски питон кој се борел со малиген тумор е спасен благодарение на револуционерен третман, првпат применет кај змија
Ветеринари и онколози за првпат во светот употребиле електрохемотерапија за да го спасат животот на питон долг 4,5 метри, кој го добил името Џоди Фостер. По сложена операција и иновативен третман, рептилот целосно се опоравил од подмолниот канцероген тумор.
Џиновскиот питон кој се борел со малиген тумор е спасен благодарение на револуционерен третман кој за првпат во светот бил применет кај змија, пишува Sky News.
Мрежест питон долг 4,5 метри во зоолошката градина во Честер, Велика Британија, именуван по познатата холивудска актерка Џоди Фостер, веќе бил подложен на операција за отстранување на малиген фибросарком. За жал, туморот се вратил и брзо почнал да влијае врз неговата вилица, пренесува N1 Sarajevo.
„Кога туморот се врати и почна да уништува дел од нејзината вилица, како ветеринари знаевме дека само уште една операција нема да биде доволна. Се соочивме со реална опасност да ја изгубиме, бидејќи туморот ја спречуваше да јаде“, вели Ијан Ешпол, главен ветеринар во зоолошката градина.
Операција на „брачен кревет“ и прв ваков зафат
Заедно со онколози од Универзитетот во Ливерпул, тимот одлучил Џоди да биде подложена на електрохемотерапија – третман кој првично се користел кај луѓе, а сега за првпат бил применет кај рептили од овој вид.
Поради огромната големина на питонот, таа била седирана во својот простор и пренесена во клиниката, каде што лекарите морале да спојат две операциски маси за да го сместат нејзиното огромно тело.
Д-р Ешпол ја отстранил туморската маса и дел од оштетената вилична коска, а потоа применил електрохемотерапија за да ги уништи преостанатите канцерогени клетки.
Методата комбинира хемотерапевтски лек, блеомицин, со серија прецизно контролирани електрични импулси насочени директно кон зафатеното место. Електричната енергија привремено ги прави канцерогените клетки попропустливи, овозможувајќи му на лекот поефикасно да навлезе во нив и тоа во многу пониски и побезбедни дози.
Целосен успех и нов живот
„Да ја видиме повторно жива и полна со енергија е неверојатно задоволство. Пред неколку месеци навистина не знаевме дали ќе преживее. Денес нормално јаде, го истражува својот простор и се однесува токму онака како што се надевавме“, додава д-р Ешпол.
Зоолошката градина потврди дека, и покрај губењето на дел од виличната коска, апетитот и способноста на Џоди за лов не биле нарушени, а неодамнешните прегледи покажуваат дека ракот целосно се повлекол.