Роберто Кавали, италијанскиот моден дизајнер кој остави свој печат во светот на модата со препознатливите, гламурозни животински принтови, почина на 83-годишна возраст. Неговиот истоимен бренд ја потврди веста во изјава споделена на социјалните мрежи во петок попладне, истакнувајќи дека Кавали живеел живот исполнет со љубов
Кавали е роден во Фиренца во 1940 година. Неговиот дедо, Џузепе Роси, бил познат сликар; Кавали тргна по неговите стапки со запишување на Академијата за уметност во Фиренца, каде што почна да експериментира со сликарство, крпеница и текстил.
Со текот на времето, тој разви иновативна техника за принтови на кожни материјали, која му донесе нарачки од Хермес и Пјер Карден и го постави на креативен пат изграден врз наметливо раскошна естетика.
„Модата е дел од нашиот живот. Кога ќе се разбудите наутро велите: Што треба да облечам за да изгледам убаво, фантастично, секси, посебно? Тоа е причината поради која сакам да бидам моден дизајнер затоа што можам да го измерам вашето расположение, вашиот живот“ – изјави Кавали во 2008 година.
Тој ја претстави својата прва истоимена колекција во Париз во 1970 година, пред да дебитира на модните писти во Фиренца и Милано, во 1972 година. Истата година, тој го отвори својот прв бутик во Сен Тропе, приморскиот француски град кој ќе стане меѓународен симбол на гламур и луксуз.
Во 1980 година, Кавали се ожени со австриската манекенка Ева Марија Дирингер, која се приклучи на неговиот бизнис како креативен директор. Двојката имаше три деца – Кавали веќе имаше две од првиот брак – и останаа заедно три децении. Тој доби шесто дете со неговата партнерка Сандра Нилсон во 2023 година.
Во средината на 1990-тите, Кавали направи револуција во светот на „тексас“ со голем број иновации, меѓу кои се растегливаните фармерки – додал ликра на ткаенината. Заедно со животинските принтови тексасот стана основен елемент на неговиот препознатлив стил, што доведе до основање на младешкиот бренд, Just Cavalli, во 1998 година.
На еден говор на Универзитетот во Оксфорд во 2013 година, Кавали ја објасни својата страст за моделите на диви животни, кои ги користел на сè, од тексас до фустани на црвениот тепих: „Ја сакам природата. Животните ги имаат најдобрите фустани. Бог ги направи толку добро облечени. На жените им се допаѓаат овие дизајни, тие се чувствуваат природно во нив“, рече тој. (Тој спонзорираше изложба во 2004 година во Музејот на уметност Метрополитен во Њујорк, насловена „WILD: Fashion Unskrotliva“, која музејот ја опиша како прикажување на „човечката опсесија со анимализмот изразена преку облеката“.)
Во 2000-тите, Кавали ја отвори својата прва кафе-продавница во Фиренца и клубот Just Cavalli, во Милано, кој стана светилник на познатиот ноќен живот во градот. Тој беше меѓу првите дизајнери, во 2007 година, кои лансираа колекција на улица, со H&М, како и проширување на домашните работи и ентериери. Меѓу повеќе разновидни потфати, тој лансираше бренд на вотка во САД во 2005 година.
Кавали се повлече од активна должност во неговата етикета во 2015 година, избирајќи го дизајнерот Питер Дандас да го наследи како креативен директор. Дандас ја напушти работата по само три сезони и беше наследен од Пол Сариџ, кој остана до 2019 година. Истата година, по период на финансиски тешкотии што доведоа до банкрот, бизнисот го купи приватна инвестициска фирма од Дубаи, која оттогаш го задржа дизајнерот Фаусто Пуглиси за своите модни колекции и понатаму се разграни во потфати за недвижнини и угостителство со брендот Кавали.
