Прегратките, тапкањето, држењето за раце – сите овие пријателски однесувања претставуваат еден вид општествен „лепак“ кој помага во одржувањето на поврзаноста во групата, објаснува Зана Клеј, приматолог од Универзитетот во Дарам, Англија.
Таа додава дека луѓето би можеле нешто да научат од своите мајмунски сродници и дека пред спортски настан, натпревар или некоја друга интензивна средба, малку физички контакт би можело да им помогне на луѓето да се чувствуваат посмирено и поповрзано, пренесува Večernji.hr.
„Физичката близина навистина е многу моќен начин за справување со стресот“, вели таа.
Научниците веќе знаеле дека шимпанзата и бонобата користат физички допир за да ги смират конфликтите и да си пружат утеха во моменти на вознемиреност. Сепак, Клеј и нејзиниот тим забележале дека животните покажуваат пријателска блискост и кога претходно немало никаков конфликт, вели Џејк Брукер, приматолог кој денес работи на Универзитетот во Утрехт, Холандија. Тој се запрашал дали големите човеколики мајмуни користат галење за да спречат конфликти, а не само за да ги решат.
Истражувачите набљудувале пет различни групи шимпанза и боноба во засолништа во Замбија и Демократска Република Конго. Тие ги снимале животните пред, за време и по моментот кога им била понудена ограничена количина кикиритки.
Кога мајмуните ќе сфателе дека пристигнува храна, станувале нервозни и возбудени, вели Брукер. Причината била едноставна: немало доволно кикиритки за сите да се најадат колку што сакаат.
Сепак, научниците утврдиле дека колку повеќе пријателски допири размениле животните пред хранењето, толку била поголема веројатноста потоа заедно да јадат без конфликт. Истиот образец бил забележан и кај бонобата и кај шимпанзата.